Sementando a nosa tradición: A Danza de Espadas nas escolas
Desde a Asociación Santa María da Cabeza temos un compromiso firme e irrenunciable: protexer, divulgar e manter viva a Danza de Espadas de Quintáns. Sabemos que o noso maior patrimonio non é só a nosa historia, senón o noso futuro. E ese futuro está, sen ningunha dúbida, nas mans das nosas nenas e nenos. Por iso, para garantir o relevo xeracional e asegurar que a nosa danza non se perda, decidimos levar a nosa tradición directamente ás aulas. Puxemos en marcha un programa de actividades e visitas escolares co que buscamos achegar a nosa cultura aos máis pequenos da forma máis dinámica e divertida posible.
Durante estas xornadas, os rapaces non só escoitan falar da historia da Danza das Espadas, senón que a viven: ensinámoslles os nosos traxes, aprenden os pasos básicos, collen as espadas con nós e senten a forza da nosa música e o compañeirismo do grupo.
Xa tivemos o enorme pracer de compartir esta experiencia en centros educativos da contorna, como o Colexio de Vilarmide, o CPI de Zas, As Xornadas de Convivencia en Muxía e o colexio de Os Muíños, onde a ilusión e a implicación da cativada foi espectacular.
A nosa maior esperanza con estas visitas é espertar nos nenos e nenas a mesma paixón que sentimos nós ao bailar. Queremos que perdan a vergoña, que se namoren da nosa cultura e, sobre todo, que se animen a apuntarse e a formar parte desta tradición. Cremos firmemente que as novas xeracións están listas para tomar o relevo e axudarnos a que a Danza de Quintáns siga xirando e bailando durante moitos séculos máis.
Queres unirte a nós? Se tes fillos ou fillas con ganas de aprender e formar parte da nosa gran familia, ou se es docente e queres que visitemos o teu colexio, non dubides en poñerte en contacto connosco a través de danzadeespadasdequintans@gmail.com ou a través das nosas redes sociais. Estaremos encantados de recibirvos!
